【輪證贏家】恒指熊睇住20天線

【now.com財經】今朝起身個天仍然都係咁暗，開電視睇咗一陣之後，忽然覺得連個電視機都灰咗一浸，皆因見到角落頭報嘅道指跌逾600點；而今朝日股都有見跌到呢個點數出嚟，港股應該倖免於難。

依家9點28分，指數完U盤後再喺作戰室制定今朝策略，剩返少少時間同老友阿賢講佢最鍾意嘅三叔公園上咗藍仔頭個YT，睇咗少少但真係要等到一陣12點先可以專心睇。

日線圖上先見指數噚日失守10線後，怕且今日都要拎埋條20線(18,640點)出嚟做量度線，而咁啱呢個位亦都同5月初/5月10日上升裂口頂部18,657點相約，再比多少少位嘅話，咪用埋裂口底18,560點囉；Slow STC914.3)兩線保持向下，保歷加通道口收窄，再加埋之前用Fibonacci見指數喺19,706點時撞到0.618，嗰時已經有戰友開定淡倉定跌，到噚日一割，70格即落袋。

「嘩！今日牛證18,500嗰層咁重貨，指數又靠近返下方牛證街貨，咁實係淡倉準備架啦！」又啱喎，的確作戰室今朝係準備定淡倉出去嘅，不過喺開市之後見指數喺開市價位度浮浮沉沉咗一陣，之後跌幅收窄到唔夠100點，痴鬼線變陣好倉9衝出去掂一掂五分鐘條10線先。

睇文嘅繼續用返小時圖去玩，見指數今朝開市擺位係低於100線，但低開高走之下，依家9點51分見燭身係穿過條100線，爬唔爬得返上去暫時未知；又咁講，即使爬到上去，但仲有條10線喺度 which is 由5月21日做阻力做到依家嘅一條線。

仲有3分鐘就到10點，見今日無乜YT節目好聽，所以開住個音樂App聽Din Din，聽住歌揀咗一隻恒指熊(59187)，收回價19,221點，為市場上最貼價熊證堆中第二高槓桿，有約32.34倍。

10點啦喎， Are you ready?

作者阿珊，以技術分析專心玩輪證，唔貪心，努力賺取我家肥貓罐罐。

Patreon新增內容《開市前速報》，七日免費試用：https://www.patreon.com/join/cbbcwar