【專家分析】零跑踩油飆 要小心追尾？

【Now財經台】零跑汽車(09863)今日(20日)跑贏大部分新能源車股，股價最多升近9%，高見34.1元，衝上逾3個月高位，收市仍升逾6%。

公司上周五(17日)收市後出季績，首季按年虧損及毛損率收窄，收入則大升1.4倍，交付量更升2.1倍至逾3.3萬部，惟按季表現較遜色，毛利率由去年第4季嘅6.7%重返負增長，零跑解釋係受累促銷及銷量下跌，推升平均製造成本。

博威環球證券金融首席分析師聶振邦認為，雖然零跑季績差少少，但按年表現有亮點，首季汽車平均售價逾10萬人仔，相比理想汽車(02015)或小米集團(01810)20萬人仔起跳嘅價錢，有更大提價空間，加上業績提及拓展海外業務嘅部署，令人憧憬今季單價同「出海」有助收入增長，進而改善毛利率。

聶Sir又指，今日新能源車股成板升，或因為市場對行業前景轉趨樂觀，已消化減價戰消息，加上最近幾個長假期嘅消費市道見改善，而零跑股價落後，較去年底仍累跌約5%，就引嚟有資金追落後。