【專家分析】小心美股套現潮陷阱

【Now財經台】Tesla及Netflix噚晚收市後出咗季績，前者差過市場預期，汽車毛利率亦要跌，股價喺盤後向下，但後者表現好過預期，股價盤後大升。科技股業績參差外，金融股亦有同樣情況，富國銀行及摩根大通都交到貨，但摩根士丹利業績麻麻。展望第4季，企業盈利前景及美股走向會係點？

東亞銀行財富管理部首席投資策略師李振豪指，美國企業盈利整體趨勢向下明顯，睇返過去兩三季，標指整體企業盈利錄得負增長，所以點解成日提及估值過高呢個問題，因為當指數繼續升，但企業盈利跌，市盈率(PE)只會高企，喺情況冇改善下繼續推高指數，風險係非常高，尤其係科技股。

佢又話，美國針對華出口晶片嘅限制不斷加辣，涉及嘅份額由美國食返，如果食唔到，點解會認為明年企業盈利可以倍數增長？所以美股投資者套現係好正常，而呢股套現潮早於7月已經開始，佢又提醒，一方面叫買科技股，實際上就低調撈低估值嘅醫療護理及公用股等，所以必須小心市場所見到嘅，同資金流係完全唔同。