【輪證贏家】Gap Theory第三個裂口或今日出現

【now.com財經】噚日打和咗隻好倉之後，指數喺下半場以慢落方式向下運行，及至最後完U指數於五分鐘圖上出現咗一支比較大嘅陰燭，將收市點數向下推低至見17,893點，莫講話18,000點，連17,900點都唔見...「失望？」唔係，當你對佢有希望時你先會覺得失望啫，連希望都唔見過嘅，講句「哦」都嫌多。

今朝恒指完U開升逾365點，大踏步上咗去18,200點樓上，多得匯金增持四大內銀A股，將指數大幅推高嘅同時，亦將熊證首兩層街貨全數殺清，呢兩層相當於816張期指街貨。到依家9點40分，指數已高開高低走，暫時計今朝開市計亦都做咗最高位。嚟到依家9點52分，指數目前仍然咬住喺18,200點附近未有太大變動，大家都係等緊方向。

以目前恒指擺位計，指數靠住上方熊證街貨層，對比起下方牛證街貨，以量計的確係熊證較少，按平時指數比較大多數時間都係向街貨打的話，呢啲位似乎係比好倉去追。

但睇返個日線圖，指數今日開市口價一彈就彈咗上去50天線水平，稍稍高過啦，因為50天線水平大約見18,240點，而到依家10點1分，恒指暫時高位見過18,259點，同今朝開市價18,258點爭一點，五分鐘圖上亦見「小圓底」生成，頸線就剛好喺呢個水平。成個技術走勢，又似開佢淡倉架喎，不過呢個都係五分鐘圖嘅樣，Day Trade的話一日裡面開完好再開淡亦都係平常事。

比多次個日線圖，如果，今日指數低位無踩返落去18,022點的話，如是者喺日線圖上，近期築起嘅「上升通道」裡面就會出現三個裂口，早幾日作戰室戰友先問過有關裂口理論(Gap Theory)相關問題，今日即刻日線圖比晒出嚟，當然，出現裂口其實無乜嘢，只係反映咗喺嗰段時間嘅嗰段位置無成交咁解，但萬一真係今日最終見裂口，而數上係第三個，即消耗性裂口(Exhaustion Gaps)出現的話，再配合埋上方條50天線，咁後市再去難度又會增加，隨時呢一Round又完。

望望鐘，依家10點16分，其實指數都仲係咬住係高位，觀乎街貨同技走勢，似乎又要battle一番，反正無貨過夜今朝個裂口彈到去邊都關唔到我事，而即市見指數於五分鐘圖仍然橫打行，都係行去斟杯水飲好過。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。

作戰室免費試用，詳見專頁：https://bit.ly/3uixP4Y