【息賺】港樓今輪跌浪快完結？

【Now財經台】本港樓市自2021年8月見頂後展開跌浪，究竟樓價見底未，市場暫時仲未有定論。成家網上投資課程導師徐冠鴻就指，比較今次跌市跟1997年亞洲金融風暴後嘅跌浪，估計今次樓價唔會跌得深過當年。

諗Sir分析指，睇返當年差餉物業估價署嘅租金及樓價指數，租金喺1995年見頂，樓價到1997年就見頂，由於租金係純消費要求，意味1995年後，支撐樓市上升嘅主要係投資需要，而非居住嘅消費需求。

諗Sir續指，對比2023年呢輪跌浪，樓價於2021年7至9月見頂，但租金至今愈升愈有，反映本地住屋需求持續增加，只係唔少人對經濟信心不足，因而失去投資物業嘅興趣。佢認為，只要有經濟利好消息，例如美國聯儲局宣布加息周期完結，樓價短期就會見底回升。