【專家分析】滙控交靚績後短炒、長揸點部署？

【Now財經台】滙豐控股(00005)中午派咗成績表，次季稅前按年多賺89%，高過綜合券商預測，但按季跌逾30%，上半年稅前更多賺1.4倍，派第2次股息10美仙，今年及明年派息率50%，此外，集團會再回購20億美元股份，業績後股價抽高，係咪畀到市場驚喜？值得留意係，加息周期似乎已屆尾聲，增長仲可唔可以持續？滙控股價今年強勢，暫時累升逾40%，後市係咪可以繼續睇好？

華盛證券經紀部董事李偉傑指，呢份業績大部分環節都好過預期，管理層都上調今明兩年有形股本回報率至15%，都係一個正面方向，因為對未來派息會有一個正面期望。加息方面，英國通脹問題仍令人頭痛，預期當地淨息差今年會持續擴闊，而出售加拿大及法國業務有機會明年完成，所以對入帳問題有較高期望，其中，出售加拿大業務會有特殊收益，集團亦指會喺派息方面回饋股東及加碼回購，都會成為股價嘅推動力。

Jason又估計，滙控股價有力再上，由於業績理想，中長線上返2018年1月高位，即71.5元水平係有可能。