【專家分析】華晨派特息冇下次？

【Now財經台】華晨中國(01114)噚日收市後宣布，考慮派特別息96港仙，刺激股價今日早段飆近19%，高見3.89元，雖然升幅好快收窄，但最終以開市價3.76元收市，逆市大升近15%。

集團舊年2月將華晨寶馬25%股權賣返俾寶馬集團(BMW)後，收到279.4億人仔，今次係繼今年1月後再宣布派96港仙嘅特別息，但年初公布消息後，市場似乎嫌派得少，當日華晨收市急挫約10%。

值得留意係，華晨股價今日升唔足96港仙，艾德金融聯席董事陳政深指，若炒作派特別息，唔足以令股價升到足，投資者仲會考慮會唔會持續派息，派息後手頭剩餘現金等因素先入場。

Ryan認為，華晨有足夠現金派息，但未必會將售股所得全部攞嚟派畀股東，因為市場或會解讀為公司冇新投資計劃。

佢又話，華晨本來同寶馬各佔華晨寶馬一半股權，但華晨出售股權後，意味未來華晨寶馬嘅盈利，華晨只能享受到四分之一嘅甜頭，仲要冇埋合資公司嘅控制權，長遠而言，市場好難對華晨嘅盈利前景有憧憬。