【輪證下半Part】右底完成咗一半

【now.com財經】好少喺呢個欄裡面揀啲咁貼價嘅證，但唔知做乜今日有少少心血來潮就係想刺激少少，所以揀咗隻恒指熊(55986)出嚟，揀嗰時係屬於貼價熊嚟架，Set好進取嘅失「平底三角形」底線出動。

以今朝Patreon出文時間10點34分，如常on top比多10分鐘作為睇文時間的話，即係喺10點44分再睇返恒指五分鐘圖，見到指數其實已經失守「平底三角形」底線，即(55986)可以落場。如常的用10分鐘作為買入時間，即10點45分至10點55分，期間(55986)高低位做過0.11元/0.095元計，平均買入價為0.1025元。

成毫子買隻熊仔確實係有啲貴，但都無法子，鬼叫恒指失心瘋一支「大陰燭」向下走，令到貼熊都變遠熊咩，正當大家諗住指數會唔會失19,300點之際，望望今日恒指牛熊證街貨圖，見牛證第一層為19,200至19,299點，呢層已經係重貨區，有相當於794張期指街貨。唔駛諗，壓得到落去19,300點的話，直落見191xx啦(作戰室都係用呢招架咋)。

唔駛等好耐，去到11點10分，恒指已經做出上半場低位19,193點，之後指數同Slow STC(14,3)稍回，所以喺呢個低位做咗「身懷六甲」出嚟，高槓桿熊見到呢啲轉勢形態就梗係走先啦，以11點15分確認「身懷六甲」起計10分鐘作為走貨時間，期內(55986)高低位做過0.121元/0.107元計，平均韭菜價0.114元，呢一起不消一小時嘅Trade賺幅平均有11.5格或11.22%。

今朝指數低位見過19,193點，同噚日「還我頭肩底！」嗰時量度嘅日線圖大型「頭肩底」嘅左肩低位(mark住為上年5月10日低位19,178點)只係差15點。如果呢個大型「頭肩底」真係要成事，咁單計右肩算是有一半已經完成，餘下嘅就要用大約個零至兩個月時間去兜返起個右肩上頸線。

依家1點11分，五分鐘圖見保歷加通道口目前收窄中，不過指數夾夾下夾返上保歷加中軸以上水平，怕且都係上半場嗰「身懷六甲」發揮作用，所以推返指數上去，反方向出好倉唔反對，但目前Slow STC(14,3)兩線已經上到超買就要等保歷加通道拓闊先好。

「還我頭肩底！」大家嗌住先，姨姨今日要去搵血，掰！

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

作戰室入口：https://www.patreon.com/cbbcwar

專頁：https://bit.ly/3uixP4Y