【Now財經台】中原策略投資(CSI)斥資逾15億元，向富豪產業信託(01881)購入九龍城富豪東方酒店，計劃將項目改建學生宿舍，點解會選擇喺依家嘅市況下做呢單Deal？
中原投資總裁葉明慧指，做呢單收購有幾個原因，包括見到學生宿舍短缺情況嚴重，大學收生多咗，但住嘅地方非常不足。另一方面，本港樓市尋底階段已完成，係一個做大型收購嘅好時機。
項目喺地點、房間數量方面有咩優勢？葉明慧表示，呢個地段係處於啟德嗰邊一個片區，同幾間大學都好近，例如浸會大學及城市大學，方便同學返學之餘，又可以好方便就去到啟德體育園區呢啲生活配套。
佢續指，除咗地理優勢，呢個項目規模相對大，根據依家嘅計劃，改建成學生宿舍後可提供近1400至1500個床位，相信可滿足附近大學嘅同學住宿需要。
中原投資預期，總投資額約20億元，營運模式或設施規劃係咪要作出好大改動及投入？投資回報期大約幾長？葉明慧預期，改裝工程需時幾個月至1年，可能會分階段進行，投資期估計4至5年。
