【FINTERVIEW】爆旋陀螺熱帶旺信和商場人流生意(上)

【Now財經台】雖然本港6月零售銷售差過預期，零售管理協會又指對下半年前景唔太樂觀，但部分商場近期丁財兩旺，更成功突圍，信和集團旗下商場近期有唔少搞作，其中，之前世界盃期間舉辦睇波活動、爆旋陀螺比賽都成為焦點。爆旋陀螺熱潮喺去年底引爆，相關比賽至今仍然進行緊，熱潮及人氣不減，而今個周末會繼續請來名人嘉賓對戰吸引人流，商戶反應係點？係咪成功谷到人流？

信和集團首席商務總裁蔡碧林指，人流方面有10%至20%增長，係超出預期，而集團堅持播足逾百場世界盃賽事，係因為知道市民鍾意集氣睇波，商戶最初對咁夜提供茶飲、小食都有啲猶疑，但隨著氣氛愈嚟愈熾熱，愈嚟愈多商戶加入呢輪消費活動。佢又話，個別商戶營業額增長約20%，尤其係茶飲、餐飲等。

至於點解會搞爆旋陀螺比賽，Bella就話，今年4月已舉辦第1次爆旋陀螺比賽，集團旗下商場有好多LED大電視，好多觀戰市民都好興奮，希望將人流轉化為生意，所以邀請咗50個商戶一齊做推廣，效果都相當理想。

蔡碧林續指，商戶都好積極，好短時間內已舉行第2次「爆旋陀螺X G1爭霸戰」，G1係香港最大型及最正式嘅比賽，50間商戶好快就促成呢件事，而信和亦將陀螺盤擺入商舖裡面，期望將人流帶埋入商舖。Bella又話，玩法會盡量簡單，例如同5間商戶挑戰，成功就會獲得禮券，或者儲印仔換禮物，方法容易，商戶好快認受到成個玩法，成績都十分理想。