【專家分析】Fed換主席會唔會影響AI股？

【Now財經台】美國10年期債息昨晚(13日)曾升至4.5厘，中標嘅30年期國債利率去到5厘，係2007年以嚟首見，反映市場認為息口會向上，依家大市係由人工智能(AI)熱潮推動，AI股對息口嘅敏感度，係咪唔及其他科技股咁高，但德意志就大派定心丸，話只要聯儲局政策清晰，換主席順利過渡就冇問題，新主席上場對市況有咩影響？

東亞證券高級投資策略師陳偉聰認為，唔會完全冇影響，始終美息向上升或者令長債息抽升，點都會對唔同估值模型喺定價上有影響，因為當無風險利率上升，令整體風險溢價擴大，令企業估值偏向下行，尤其係科技股，因為本身估值較高，殺估值壓力都會較大。

Jason續指，但依家以乎冇太大負面影響，主要係呢段時間公布嘅業績，超出預期嘅程度都幾誇張，指引亦理想，因為AI上游晶片算力，再到之後嘅雲及後期應用，增長都愈來愈快。但佢提醒，一旦呢啲企業盈利增長放緩，而整體無風險利率抽升，當兩樣嘢一齊發生，就有機會出現震盪或調整。