【古埃及文明大展】黑貓爆紅炒貴2倍「有價有市」？

【now.com財經】本港歷來規模最大，展期最長嘅古埃及文物珍藏展覽日前開鑼，場面墟冚，人潮迫爆香港故宮文化博物館，除咗要延長開放時間，更一度要暫停現場售票，除咗睇展覽，仲意外地衍生一個「另類商機」。

為咗吸引年輕人入場，博物館亦好貼地，破天荒推出「古埃及主題盲盒」毛絨掛飾，一Set共有6款，包括木乃伊、法老王等，每個128蚊，喺館內發售，另一隻黑貓毛絨公仔成功「跑出」，共有兩款，其中一隻賣248蚊，另一隻大貓就賣298蚊，呢兩隻貓喺二手市場人氣急升，「冇戴帽」炒價500蚊，「有戴帽」炒到900蚊。

又一次反映港人「乜都可以炒」嘅特性，同埋好識得捕捉「商機」嘅市場觸覺。

此外，網民亦提供咗「抽盒貼士」，增加抽到心儀盲盒嘅機率:

胡狼:盲盒左右兩邊細細撳落去，會有好明顯嘅角。

法老王:因為面部大，盒會明顯漲及左右迫爆。

木乃伊:搖盒時音明顯好空洞，同埋有匙扣聲。