【《TIME》2025發明榜】宇樹R1機械人、DeepSeek大模型齊上榜

【now.com財經】美國《時代雜誌》(TIME)公布2025年最佳發明榜，共有300款產品上榜，當中唔少係來自中國，包括華為及DeepSeek等。

消費電子產品方面，中美兩大科技巨企蘋果公司(Apple Inc.)、華為齊齊上榜，前者入圍產品係以出色音質深受消費者喜愛嘅AirPods Pro 3，後者就憑擁有強大影像功能嘅Pura 80 Ultra成為焦點。

《時代雜誌》對Pura 80 Ultra嘅評價係，無論用家處咩環境及光線條件下，都影到細節豐富、顏色sharp醒嘅相片或影片。

機械人方面，宇樹科技嘅Unitree R1人形雙足機械人成功入選，《時代雜誌》話，R1有26個關節，可以做到拳擊、跑步及空翻呢啲複雜動作。

至於中國明星科企DeepSeek嘅R1推理大模型，就入選人工智能(AI)發明榜，《時代雜誌》特別提及，R1訓練成本只係600萬美元，當中所需嘅算力只係美國競爭對手嘅零頭，反映喺呢啲範疇有極大優勢。