【FINTERVIEW】歐股下半年繼續跑贏美股？(下)

【Now財經台】美股自4月開始反彈，其中，標指昨日(26日)一度高見6146點，同歷史高位相差唔夠1點，不過，整體仍跑輸歐洲股市，其中，德國股市上半年不斷創新高，當中以軍工股表現最標青，歐股上半年強勢可唔可以延續至下半年？

安柏環球金融首席投資總監雷志海認為，歐股有望保持強勢，因為上半年有驚喜，歐洲龍頭德國一改守財奴心態，取消軍費開支上限，促使市場重新審視整個行業板塊。不過，依家德國工業股、汽車股都面對中國車企不斷擴大喺歐洲市場份額嘅挑戰，所以汽車股表現較差。

佢又話，德國股市走勢強勁，除咗軍工股係升市主力外，科技軟件都可以受惠，人工智能(AI)概念及軍工股都對歐洲及南韓股市有推升作用。