【FINTERVIEW】港金融業回暖帶動經濟增長(上)

【Now財經台】瑞銀曾於4月中預測本港今年經濟增長1%，本周就上調本地生產總值(GDP)增長預測至2.2%，今次上調預測係基於咩因素？本港金融業回暖對本港經濟增長有幾大幫助？

瑞銀投資銀行高級亞洲及中國經濟學家鄧維慎指，美國4月初公布嘅對等關稅(Reciprocal Tariff)係前所未見，但呢段時間出現一啲重大變化，見到一啲高附加值商品被納入豁免清單，相信香港作為高附加值嘅貿易中心可以從中受益，此外，中美貿易關係緩和亦有幫助。

William又話，本港第1季GDP增速遠超預期，為未來打好基礎，踏入第2季度以來，見到本港經濟有進一步企穩跡象，金融市場交投亦較穩健，「五一黃金周」訪港旅客人數創新高，呢啲都會對本港經濟增長有幫助，所以上調咗全年預測。

William續指，香港作為亞洲金融中心，金融業表現活躍及穩定會有利經濟增長，雖然利率短期或會波動，但睇返現時嘅趨勢，息口會逐步回落，而低息對金融業交投有一定幫助，佢又指，瑞銀策略團隊近期上調恒生指數預測至24500點，並認為全年交易活躍度有唔錯嘅正面增長，大概率出現賺錢效應同財富效應，有助提升本港金融活力。