【名家給力場】美股短期仍會陷悶局

【Now財經台】雖然有美國推遲向歐盟加50%關稅嘅利好消息，但美元仍然弱勢，美匯指數跌至99水平，見逾1個月低位，反映市場仍對美元信心不足，而美債息持續高企嘅憂慮，係咪會繼續困擾市場？

資深投資者莫家強認為，美債憂慮仍會困擾市場一段時間，因為喺美國總統特朗普(Donald Trump)嘅政策下，或令美國財政狀況惡化。佢又話，長債息高企亦會令市場資金更緊張，呢個情況好難喺短時間內解決，所以就算美股自低位反彈，之後都要再整固。

Alex又指，市場一直最怕不確定性，若特朗普嘅政策明朗化，可以令投資者判斷邊啲公司唔受關稅影響，從而搵到入市機會，不過，特朗普嘅談判策略仍然係「開天殺價，落地還錢」，由於投資者好難做評估，包括企業估值，所以資金唔會蜂擁入市，而美國嘅財政狀況及搖擺不定嘅政策，都會令美股暫時陷入一個悶局。