【輪證贏家】恒指熊捉小時圖「射擊之星」

【now.com財經】勁嬲，邊個式程盤撳晒啲沽盤出嚟，搞到上個星期五下晝1點40分五分鐘之內暴力推指數插200點，將指數喺小時圖10線都堆過埋，搞到隻恒指牛(53897)過線要走；但之後指數由22,098點向上抽返上去過埋噚日高位先?!

嚴守策略真心無計，莫講話用五分鐘圖10線睇住走，嗰一下真係完全未撳得切，打開機嘅可以得嘅。(53897)就正正喺一個位Hit中咗下方量度線，如常用10分鐘走貨的話，按期內高低位做過0.096元/0.069元，平均走佬價價為0.0825元，係，呢一注都仲有9.5格或13.01%落袋，係仲係正數，但件事唔應該係咁架嘛，3點後隻(53897)上到毫幾子呀，30格呀大佬！

Anyway，指數上到嚟呢個位，大家都開始拎返上年10月7日高位23,241點出嚟做目標，以上個星期五收市價，兩者相距都只係600零點，以呢期嘅波幅嚟講都唔算得係啲乜嘢點數。

指數開市之後到依家只係過咗8分鐘，作戰室繼續順勢而行，指數依家已經向上搖到上23,000點咁。噚日中午出席舊同事嘅禮宴，席間被問今日有無機會可以做Day Trade，配返以提問者向來嘅玩法，我只係答一句：如果你諗住買完之後兩三個鐘再睇咁嘅Day Trade的話，唔得；但如果你可以坐定定喺度幾分鐘咁做晒所有嘢睇住嘅話，可以。因為依家嘅市只係打字打一句嘢，就已經可以郁你50至100點。

10點未到見指數喺五分鐘圖上開始落返去10線位置，Slow STC(14.3)喺五分鐘圖上亦見指數觸頂向下回落，整條保歷加通道亦保持返向上運行，Swing Trade鵲條件出現，問題依家指數係借保歷加頂線同邊一條線行Swing。

10點前喺小時圖見到高位出「射擊之星」，又嚟強勢升市偷位出淡倉捉嗰種快感嘅心態出現啦，真係作戰室都已經有戰室比我更快見到「射擊之星」兼做埋淡倉。

恒指熊(54387)，收回價23,250點，同現價有約381點距離，槓桿有約53.2倍，用五分鐘圖逐線逐線向下打，依家10點7分見已經打到落去中軸線啦，如果到你睇完之後過到中軸的話，繼續向下掃線啦！

作者阿珊，以技術分析專心玩輪證，唔貪心，努力賺取我家肥貓罐罐。

Patreon作戰教室七日免費體驗：https://www.patreon.com/join/cbbcwar