【名家給力場】2024年忌沾手本地銀行股(下)

【Now財經台】高盛最新報告指，本港樓市疲弱，不但打擊地產股表現，本地銀行股會受更大影響。勝利瑞柏基金管理合伙人暨投資總監陳建良表示，過去1年唔少本地銀行因為內地房地產嘅風險敞口(exposure)遭下調評級，但市場似乎低估香港地產同樣帶俾銀行唔少風險。

KL分析本地銀行嘅內地及香港房地產風險佔比，指出大部分銀行嘅風險集中喺三方面，包括借俾發展商嘅貸款、為商業物業做嘅槓桿(gearing)、本地住宅按揭。當前高息口環境加上本港經濟麻麻，令銀行借貸時要承受更大壓力，而本地銀行板塊嘅股價尚未完全反映呢個負面因素。

KL認為，今年應該避開投資本地銀行股，並指市場誤以為之前港美息差擴闊，有助推升本地借貸需求，但而家經濟轉差，銀行反而需要為不良貸款嘅潛在損失做減值撥備(provision)，繼而對今年度嘅財務表現有負面影響。