【名家給力場】價格戰殺埋身！電訊股買唔過？(下)

【Now財經台】港股繼續陰乾式向下，不過，香港電訊(06823)及數碼通電訊(00315)股價今年逆市靠穩，股息率仲有7厘，投資者係咪可以考慮買本地電訊股避險？

勝利瑞柏基金管理合伙人暨投資總監陳建良指，2隻電訊股最新公布嘅業績都幾靚仔，撇除補就業計劃補貼仍有增長，加上成本唔太受息口及能源價格影響，似乎都係穩陣之選。

不過，市場低估咗一個風險，就係經濟下行時，行業可能會爆發價格戰。

KL預期，電訊商短期會爆發價格戰，又指消費者喺經濟差時會「慳啲使」，或「轉會」至較平嘅電訊商，而近期嘅手機銷售數據都呈下跌趨勢，意味即使電訊商成本穩定，未來收入亦可能會跌。

陳建良續指，5G喺香港逐漸成為主流，電訊商為咗搶佔市場份額，好可能會用低價吸引新客上台，以及同舊客續約，到時盈利就會壓縮得好快。

佢又指，若電訊商真係爆價格戰，低價嘅上台合約起碼為期2至3年，意味盈利起碼受壓1至2年，電訊股息率又追唔上美國加息速度，所以買嚟收息抗通脹係唔成立，因此，投資呢個板塊前要諗清楚。