【專家分析】「寧王」第4季盈利表現更大鑊？

【Now財經台】寧德時代(03750)第3季純利增長放緩，股價今日(21日)一度大瀉逾11%，創去年7月以來新低，更遭大行劈目標價，點解市場對業績咁失望？目前大行除咗摩根大通削目標價至440元，其他如瑞銀都維持目標價喺逾700元，係咪仲有一絲希望？

高歌證券金融首席分析師聶振邦指，「寧王」第3季收入增長雖維持超過50%，但純利增長由頭兩季嘅逾30%急速放緩至逾14%，的確有反差，反映市場低估咗外部環境變化對其盈利能力嘅衝擊。

聶Sir話，大行之前睇超過700元目標價，係基於頭兩季盈利高基數下，盈利表現仍然有驚喜，如今第3季增長放緩，估值模型自然要相應下調，預料大行會陸續削目標價，至少去到550元或以下先可反映實況。

佢補充，目前相信都係產品組合影響毛利，從而影響整體盈利變化，因為9月起實施嘅2%鋰電池消費稅，喺第3季只係反映咗1個月，加上國內考慮喺2027年提升稅項到4%，去到第4季叠加埋稅務問題，業績可能未必有增長，甚至進一步放緩至單位數或持平情況。