【專家分析】宇樹股價彈只係「虛火」未衰完？

【Now財經台】A股及港股機械人相關股造好，科創板上市嘅宇樹科技股價連升3個交易日，係咪已經見底，還是係階段性止跌？消息面方面，OpenAI創辦人話正研發人形機械人，將於2027年同大家見面，英偉達(Nvidia)圖形處理器技術大會(GTC)喺德國柏林舉行，會上談及物理人工智能(AI) 、機械人等議題，消息面係咪真係重要？還是只係氣氛令機械人概念股有得彈下？

元宇證券大中華區股票投資總監趙晞文指，宇樹上市第1日已見咗高位，之後由於市況唔就，股價就返落嚟，近日受惠於行業利好消息，股價就自低位回升，成交額亦配合。過去一段時間，A股板塊輪動好著重人工智能(AI)產業鏈，但依家AI產業鏈處於一個unwind狀況，資金要泊岸，一係揾穩定嘅中特估或短期題材，咁啱機械人產業有消息，就引發內地資金短炒一轉。

佢續指，雖然宇樹收復部分失地，但現階段見唔到有重估嘅可能，因為估值重估需要產業鏈出現比較明確嘅增長曲線，現時只係消息面造成短期反彈。