【期匯決算】資金點解翻兜美長債？

【Now財經台】美國9月消費物價指數(CPI)超預期，令聯儲局今個月加息預期再升溫，今晚(15日)就會公布工業生產者出廠價格指數(PPI)及零售數據，會唔會再一次令市場驚嚇？不過，CPI昨晚(14日)出爐後，美國10年期債息不升反跌，僅2年期債息向上，美匯指數曾經向上，但今日又回落，最新喺102水平徘徊，冇破位但又跌唔落，有分析指，資金泊返去長債，點解讀呢個情況？

獨立外匯商品分析師盧楚仁表示，美國上周拍賣10年、30年期長債，反應熱烈，反映市場完全唔擔心美債，除咗股市疲弱，買美債有半避險作用，亦因為美債息吸引，依家有逾5厘回報，覺得好過定存及買樓收息，買高息股有股價跌嘅風險，加上聯儲局官員放風令市場認為加息周期去到尾聲，呢啲因素都令美債價回升，債息回落。