【FINTERVIEW】美股資金輪動下吼公用股(上)

【Now財經台】近兩個月標普500指數及納指屢創新高，但都係靠科技股獨撐，科技股升咗咁多，令資金出現輪動情況，瑞銀指，資金似乎由「擠擁」嘅科技、半導體以至保險板塊，轉戰工業、能源等冇咁「擠擁」嘅板塊，點睇呢個情況？

金馬資本管理交易策略總監蘇沛豐指，上半年科技股跑輸，唔少投資者都分散投資，轉戰其他板塊，但科技股經歷呢輪跌勢後又平返，例如英偉達(Nvidia)嘅預測市盈率(PE)僅約17倍，令投資者翻兜科技股。

Daniel又指，近期資金轉戰較落後嘅行業，特別踏入10月，美國長債息喘定返，冇再衝上去，加上美國長債拍賣反應較預期好，令之前受債息急升拖累嘅板塊，如防守性行業及公用股等開始出現反彈，由於科技股回調剛剛開始，資金仍會繼續輪動，投資者可以考慮公用股，例如Google母公司Alphabet與星座能源(Constellation Energy)簽訂長期核電供電合約，反映人工智能(AI)對長期發電需求強勁，消息會對公用股有利。