【專家分析】美半導體股「買」定「離手」？

【Now財經台】OpenAI年度開發者大會(DevDay 2026)會喺美國時間周二(29日)喺三藩市舉行，原本預期會發布嘅新模型「GPT6.1 Astra」，因為有欺騙等安全問題，臨時取消發布。此外，Meta、OpenAI等行政總裁將會同美國總統特朗普(Donald Trump)會面，估計會傾人工智能(AI)安全及發展問題。「習特會」結束後，科企巨頭就急急會面，係咪代表美國AI發展有機會要放慢？

高富金融集團投資總監梁偉民認為，AI公司自發放慢發展步伐機會唔大，雖然有唔少AI公司高層提醒，發展AI嘅同時都要兼顧安全性、對人類嘅威脅，不過，AI市場競爭激烈，加上利益考慮，放慢發展步伐代價太大。佢又估計，大模型密集推出嘅情況應會持續。

Wyman又話，AI發展步伐唔減慢，唔代表前景一定好，AI公司變現問題仍未畀到市場足夠信心，而呢啲公司大部分仍處於開發階段，真正賺到錢嘅唔多，即使有錢賺都唔足以令公司資本開支達至平衡，因此，半導體股未來會唔會繼續火熱，關鍵仍在於可唔可以開拓到變現途徑。