【專家分析】市場最關注「習特會」傾AI安全？

【Now財經台】國家主席習近平抵達美國，美國總統特朗普(Donald Trump)親自接機，同一時間，美國財長貝森特(Scott Bessent)宣布，中美貿易「休戰期」延長2個月至2027年1月10日，較市場預期嘅3至6個月短，會唔會令市場失望？今次中國企業高層未有隨行，對今次中美領導人會面成果有咩影響？

東亞證券高級投資策略師陳偉聰相信，市場都唔會太失望，關鍵係中美元首會談後，可唔可以落實更實際嘅協議，例如中方願意加碼購買美國產品，例如能源、飛機或農產品等，到時「休戰期」可能喺兩個月有再延長嘅空間，甚至可能爭取到部分商品豁免關稅或下調稅率。

Jason又話，雖然之前特朗普訪華時，有好多美國巨企大佬隨行，但最終喺商業層面嘅實質定單冇明顯增加，今次冇中企高層隨行，唔代表兩國商貿往來疏離，不過，喺特定產業嘅討論，尤其高科技及半導體等領域，相信要達成共識嘅機會可能較低。此外，市場都比較關注，早前美方提出放寬部分高端人工智能(AI)晶片出口、中方採購意願，以及近期AI安全爭議，能否喺未來兩日會談中取得進展。