【名家給力場】沃什寧犠牲經濟都要遏通脹

【Now財經台】美國聯儲局一如預期加息0.25厘，係沃什(Kevin Warsh)接任後「頭炮」，亦係3年以嚟首度加息，睇返美國最新通脹數據，美國今年仲會唔會加息？今次加息點影響美國經濟？

臻享顧問董事總經理王良享指，據「點陣圖」(Dot Plot)顯示，12月應該有機會加息，美國長債息8月開始持續上升，市場透過長債息扯高觀察聯儲局遏通脹能力及決心，美國總統特朗普(Donald Trump)唔想加息，但沃什似乎目標明確，就係要將通脹降至2%，雖然加息冇辦法壓低油價，亦唔能夠令特朗普停止加關稅，喺控制唔到外部價格下，聯儲局唯有透過加息令經濟放緩，待失業率上升、美國經濟增長放緩先會停手。

Tommy又認為，美國經濟結構近年出現轉變，唔再單靠消費，自去年《大而美法案》推行企業投資100%紅利折舊(Bonus Depreication)後，今年企業投資佔美國增長好大部分，尤其人工智能(AI)，加上美國家庭債務佔國內生產總值(GDP)比例，已由2008年100%降至71.6%，債務與資產比例僅約15%至20%，反映美國消費者有能力借錢，不過，現時比較擔心AI企業相繼搶高原材料價格，未來一旦有大型雲端製造商削減投資，高度依賴資金投入嘅AI產業鏈或面臨考驗。