【名家給力場】美債息好難壓低？(下)

【Now財經台】環球主要經濟體債券爆發拋售潮，刺激債息集體抽升，其中，美國30年期債息喺上月中升至19年高位，美國財長貝森特(Scott Bessent)突然出手，回購國債規模加碼1倍，由20億增至40億美元，當時債息的確有反應，但壓低長債息效果相當短暫，係時候未到定招數冇用？

「股市漁夫」創辦人莊志雄指，招數未必有用，因為宣布嘅效果比較明顯，美國聯儲局主席沃什(Kevin Warsh)剛上任時，喺議息會議發言偏鷹，將2年及30年期嘅息差壓咗落去，孳息曲線平咗，但7月議息會議又放鴿，息差就抽咗上去，令財長要貝森特出手。

Lewis又話，市場默認5.5厘係「死線」，所以依家財政部同聯儲局聯手要「封頂」，但封到個頂，就壓唔到落嚟，要聯儲局幫手做大量量化寬鬆(QE)先可以。

佢提到，聯儲局做QE時會印銀紙，創造新嘅基礎貨幣，然後買入政府債券，呢個係比較中性嘅做法，但依家唔係咁做，因為財政部想改變平均債券個年期，發行國庫券去回購現有嘅長期債券，縮短整體債務年期，都可以釋放流動性。