【名家給力場】AI「剋星」CrowdStrike等軟件股有買貴冇買錯？

【Now財經台】全球最大客戶關係管理應用軟件公司Salesforce季績超預期，集團更大幅上調全年指引，其中1個亮點係旗下人工智能(AI)產品Agentforce及Data 360年度經常性收入(ARR)按年倍升，當中Agentforce更按年飆逾2倍。此外，美國網絡安全公司CrowdStrike亦交出超強季績。呢啲業績好消息某程度上係咪可以否定市場指「SaaS(軟件即服務)已死」呢個講法？

冠域商業及經濟研究中心主任關焯照指，SaaS能否生存取決於適應力，軟件股點樣同AI共存先至係關鍵，正如英偉達(Nvidia)行政總裁黃仁勳所講，市場對AI嘅需求已真正走向實體部署及應用，若成功將AI融入生意係可以好成功，CrowdStrike、Salesforce就做咗一個好好嘅示範，兩家公司「適應」得最好就賺到最多錢。

關博士續指，網絡安全行業一定係最受惠，又形容AI係魔鬼，所以需要靠網絡安全抵擋，因為AI可以發動更強勁嘅黑客入侵，需要靠網絡安全軟件抵抗，所以CrowdStrike、Palo Alto Networks股價全部大升，雖然市盈率(PE)貴，但因為有需求，所以前景值得睇好。