【名家給力場】金價今年難再破頂？(上)

【Now財經台】8月以來金價、金礦股都跑贏大市，美國財政部上周將長債回購規模加碼1倍，但對美股、美債幫助唔大，反而金價及比特幣(Bitcoin)最受惠，呢個情況反映緊乜嘢？市場係咪仍然對美元資產有戒心？

「股市漁夫」創辦人莊志雄表示，美匯指數8月至今跌唔夠1%，同期金價就升咗15%，金礦股更飆42%，Bitcoin價格亦抽升25%，所以話金價升純粹基於美元貶值交易就講唔通。

佢又話，其實第1季已提到減持黃金相關倉位，金價今年見咗高位後，大部分時間喺每盎司4000至5000美元上落，接近4000美元就可以加返少少，不過，現時去返近4700美元，已過4500美元呢個中間位，但唔期望今年會破頂，即使今次將美債回購規模提高1倍，都只係40億美元，同以往美國聯儲局做量化寬鬆以數萬億美元計，相對於整體美債市場喺好細嘅數目。

Lewis又指，市場會憂慮美國政府連通脹都未控制好，會質疑增加美債回購規模係咪針對根本性嘅財赤，所以金價表現係市場向政府發出訊號，增加美債回購規模又唔理通脹，長期係削弱美元、美債地位。