【FINTERVIEW】美中期選舉前避周期股吼防守股(上)

【Now財經台】摩根大通繼續睇好全球股市，並預期下半年升市行情將會擴大，原因係企業盈利及經濟活動指標有改善，又估計周期股如銀行、奢侈品、建築材料等，有望跑贏低波幅股票，科技及半導體股會趨向穩定，但唔會出現反彈。環球股市後續係咪好似摩通睇得咁樂觀，仲有冇力破頂？周期股係咪升市主力？

金馬資本高級交易策略師蘇沛豐表示，未來3個月，大市指數有機會創新高，但推指數上去要視乎行業發展，例如近幾個月較少投資者關注嘅健康護理股、工業股，其實都先後創新高，反觀早前瘋炒嘅人工智能(AI)、半導體股就見底，所以好難推高大市指數，暫時偏向整固階段。

Daniel又指，美國11月舉行中期選舉及美國聯儲局加息，都存在不確定性，所以唔一定睇好周期股，佢認為，投資者應該揀返防守板塊，例如健康護理、公用、基本消費類，市場亦會逐步消化，並調低返加息預期，令債息有機會回落，對穩定收息類股份估值會有支持。