【專家分析】美企下季盈利增長勢縮水

【Now財經台】美股喺8月有個好開始，3大指數昨晚(3日)齊高收，其中，道指收市勁升693點，兼創收市新高，納指亦升逾2%，美股近期強勢主要由企業季績帶動，睇返已放榜嘅標普500企業盈利，表現係多季以嚟最強勁，係受咩因素推動？

高富金融集團投資總監梁偉民指，業績的確係強勁，派咗成績表嘅公司，盈利平均按年增長近40%，遠超市場預期嘅約23%，主要涉及2大因素，首先係能源公司受惠於油價上升，令上季盈利倍升，其次係Google母公司Alphabet盈利之中有1項非一次性嘅增長，主要係公司持有嘅股票升值但要小心下季未必再出現呢個情況。

Wyman預期，企業未來盈利增長應該唔會好似上季咁勁，又提醒企業盈利高增長係靠人工智能(AI)相關嘅投資帶動，所以都要睇住大型科技龍頭嘅資本開支係咪繼續好誇張及持續增加，亦要留意美國經濟及消費情況，因為唔係一面倒向好，所以之後都要留意。