【名家給力場】4大Hyperscalers冇減開支美股暫鬆一口氣(下)

【Now財經台】4家Hyperscalers，即微軟(Microsoft)、亞馬遜(Amazon)、Google及Meta出咗季度業績，一如預期，因為發展人工智能(AI)，令全年資本開支大增，4家公司合共涉及逾7000億美元，據業績披露，Google母企Alphabet首度錄得負自由現金流，市場係咪唔滿意？

「股市漁夫」創辦人莊志雄指，整體嚟講，市場反應係持平，股價都冇受太大影響，喺過去1個月，最受影響係半導體、記憶體股票，4家Hyperscalers公司公布業績，仍繼續大幅增加資本開支(CapEx)，所以之前市場擔心4家公司開始減CapEx，出完業績就知道冇減少，所以個市就暫時企穩咗，加上微軟份業績都幾緊要，之前有人估計Azure及其他雲收入增長不足40%，最終出嚟係43%，成功達標。

Lewis又話，用業績嘅消息推上推落，而咁啱上星期個市去到好超賣嘅情況下，就用業績嘅消息推返上去，呢個係依家個格局，如果要改變個格局，就係當Hyperscalers投資咗咁多錢，最後見利潤率下降，減少CapEx，到時先要擔心，依家就似乎可以鬆一口氣，睇埋下季。