【名家給力場】恒指已彈完 恐殺落22500點(上)

【Now財經台】港股今日(17日)又跌過，恒生指數半日瀉近500點，又跌穿25000點及50天線，港股近期嘅反彈係咪已經完結？如果已經彈完，恒指會落返咩水平？

勝利證券首席顧問陳建良表示，之前都提過恒指會有輕微反彈，過去4日嘅反彈應該已完咗，見到4支「陽燭」。過去一段時間，港股係一個輪流炒嘅格局，指數跌到差唔多就升返少少，冇明顯嘅焦點，所以唔會係見底回升，而喺25000點水平已經有好大阻力。

KL又估計，4支「陽燭」將會消失，恒指會落返23000點水平，但跌勢唔會好似6月咁急，會相對跌得慢啲，間中會有反彈，估計最終會下試6月中低位，即22500點水平。