【專家分析】解禁股唔好亂入

【Now財經台】自6月底開始，一批人工智能(AI)相關半新股開始陸續「解禁」，值得留意係，多隻AI股「解禁後即Cap水」，繼智譜(02513)及天數智芯(09903)後，最新輪到MiniMax(稀宇科技)(00100)，公司今朝(10日)出咗通告，以每股268元，較昨日(9日)收市價折讓近10%，配股集資約95億元，另發零息可轉換債券(CB)，換股價335元，集資約65億元。其實MiniMax股價昨日已偷步大跌17%，今朝一度再挫逾10%，低見266.2元，點睇呢個「解禁變Cap水」現象？

艾德金融投資執行董事文錦輝指，呢類半新股或AI半導體股的確需要資金，但從另一個角度睇，不論發CB或有折讓都會有人要。佢又話，如果落獲時氣氛好，股價係可以翻倍，但MiniMax自高位跌落嚟，已經跌凸咗好多，其實有啲危險，加上不斷有半新股解禁，會對大市造成衝擊。

Felix續指，有啲機構投資者解禁後，真係未必會沽貨，但都唔可以盡信，因為佢哋會有好多方法對沖，例如期權或指數去鎖定利潤，因此，如果依家買賣就快解禁嘅AI股要好小心。

佢又話，MiniMax昨日走勢差，跌穿300元，如果暫時上唔返300元，就唔好心急買貨，要慢慢睇下邊隻解禁股有實力，再考慮入手。