【專家分析】內銀股「走資」唔止衰違規

【Now財經台】雖然港股踏入7月日日升，但動力又未至於好大，內銀股係其中一個限制咗港股升勢嘅因素，內銀股6月中開始持續向下，至今普遍回落逾10%，之前國家審計署點名幾家內銀，涉及逃稅及違規貸款，呢個係咪資金流出內銀股嘅主因？

亨達財富管理董事總經理姚浩然指，呢個都可能係令資金撤離嘅原因之一，內地整體經濟唔算好強，息口未來會保持喺一個相對低水平，會為銀行淨息差帶嚟壓力。

Patrick續指，貸款渠道都對內銀有影響，因為大部分都係商業貸款，因此，除咗低息會影響淨息差外，內銀對貸款嘅風險計算都會限制咗貸款生意，加上支付畀存戶嘅利息較多，貸款收到嘅利息較少，變相影響利息收入。