【專家分析】滔搏派錢都救唔到股價？

【Now財經台】滔搏(06110)股價已連跌第7個交易日，今日(24日)一度急瀉15%，低見2.04元，依家內地社媒流傳，話明年1月1日起，Nike會取消線上一級經銷商授權，日後只可以透過官網買嘢，呢單消息可唔可信？係咪因為呢個傳聞令滔搏股價又大冧？

元宇證券投資總監林嘉麒指，Nike作為國際品牌，初期要打入內地市場，一定要靠分銷商幫手，但依家業務成熟，後續肯定希望攞返個經銷權，不過，呢個消息又未必可以盡信，因為時間上太緊迫，如果事先知道，公司要率先披露相關合約，但依家冇主動咁做，所以未必一定係事實。

KK又話，滔搏股價今日大跌，可能投資者係因為派息問题沽貨，因為冇咗Nike咁大一項業務，嚟緊派息都會受影響，市場亦擔心公司現金流、派息，佢又認為，因為集團基本面轉差，好難扭轉短期股價弱勢，甚至有息派都未必幫到股價。