【專家分析】美股今年出現「情緒殺手」

【Now財經台】美股3大指數輪流破頂後，昨晚(22日)輪到反映細價股表現嘅羅素2000指數突破，點解釋今輪升勢？此外，費城半導體指數(SOX)今年已累升88%，但人工智能(AI)及半導體狂熱似乎仲未完，投資者可以點部署？

高富金融集團投資總監梁偉民指，通常小型股向上係因為市場預期經濟復甦，同埋息口相對溫和，但依家市場開始擔心加息，羅素2000反而破頂，Wyman就認為，今次係由市場情緒推動多啲，今年股市特色就係畀情緒帶住走，唔係太關注基本面，但投資者要小心，現時估值真係貴，同時亦有隱憂，如息口上升同中東局勢未明等因素。

Wyman又話，半導體板塊現時估值偏貴，好多公司嘅股價已反映咗未來幾年好誇張嘅盈利增長，如果公司指引未能滿足市場預期，或者盈利增長唔達標，隨時會引發調整，例如之前嘅博通(Broadcom)，但依家股市調整完，隨時又會創新高，投資者可能會迷惑，唯一可以做就係定止蝕機制，跌超過10%至20%就考慮下洗唔洗減倉。