【名家給力場】美股動力股響「警號」？(下)

【Now財經台】美股近期升勢強勁，不斷破頂，依家啲動力股嘅動力有幾誇張？後市有咩重要事件要留意？

「股市漁夫」創辦人莊志雄指，目前動力非常誇張，今年動力股喺大部分時間都跑贏低波幅股，但跑贏幅度已經偏離趨勢線5個標準差，係非常罕見嘅現象，以往出現類似偏差後，市場都會自動修正，例如2008年6月指數同樣偏離極遠，隨後下半年爆發金融海嘯，動力股跑輸，當時個股沽空比例都係好高，同現時市場狀況相近，相似情況亦出現喺2021年的「契媽」熱潮，但現階段好難預測大市幾時會正式掉頭。

Lewis又話，嚟緊可以留意幾個大日子，包括下周三(10日)美國將公布消費物價指數(CPI)，要留意今次會唔會突破4%，另外下周五(12日)SpaceX預期上市，相信會吸引龐大資金，早前被熱炒嘅半導體及儲存股，隨時有機會因資金流走而轉弱。

佢又補充，歐洲央行及日本央行將會喺下周四(11日)及6月16日公布議息結果，可以留意加息幅度會唔會超出市場預期，或反映環球央行開始收緊抗通脹，同埋6月17日，新任聯儲局主席沃什(Kevin Warsh)將會公開發言，可會關注其言論會唔會釋放收緊貨幣政策嘅訊號。