【專家分析】Nvidia踩入PC市場暫難幫手谷盈利？

【Now財經台】英偉達(Nvidia)創辦人黃仁勳昨日(1日)喺台北GTC大會(GPU Technology Conference)公布一系列新產品，刺激Nvidia股價昨晚大升逾6%，黃仁勳提及，Nvidia將會踩入個人電腦(PC)市場，推出CPU+GPU一體化產品，並宣布新一代人工智能(AI)晶片Rubin已全面量產，點睇呢個消息？CPU大戰係咪已白熱化？

高富金融集團投資總監梁偉民指，市場擔心其他科技巨企自行研發AI晶片，會威脅到Nvidia嘅市佔率，所以依家有1個新增長點，對投資者嚟講都係好消息，但問題在於PC及CPU市場本身競爭已經好大，例如傳統參與者英特爾(Intel)、超微半導體(AMD)等，因此，Nvidia可唔可以突圍仍要觀望，雖然Nvidia股價被炒起，但Wyman認為，短線未必對實質業績有好大幫助。

佢又話，過去兩個月，市場投資焦點落喺CPU身上，今年以來，Intel股價已飆近2倍，但CPU新貴當中，Arm反而更突出，因為喺AI應用方面，Arm耗電量相對較少，未來科技企業喺人工智能代理(AI Agent)方面，或會選擇有慳電優勢嘅Arm架構，投資者要留意市場格局或會出現變化。