【名家給力場】「世紀IPO」抽乾市場資金畀美股回氣？

【Now財經台】若美伊下周傾掂數，中東局勢緩和，係咪有利美股走勢及市寬(Market Breadth)回升？市場後續焦點一定係美股幾隻「世紀IPO」，即SpaceX、OpenAI及Anthropic，打頭陣嘅SpaceX估值高達1.75萬億美元，雖然招股文件踢爆公司蝕錢，但相信無阻市場嘅熱情。呢啲「世紀IPO」肯定抽乾市場資金，呢啲股份上市後，係咪都要預大市需要一段時間回一回氣？

冠域商業及經濟研究中心主任關焯照直言，對美股市寬回升唔係太樂觀，始終美股依家只有3個板塊可以落注，包括記憶體、儲能及光通訊，呢啲板塊近期都自低位回升，即使市寬擴闊返，啲錢都會流向傳統大型銀行，例如投行高盛(Goldman Sachs)及摩根士丹利(Morgan Stanley)，受惠於大型IPO，呢兩家銀行股價近日齊破頂，加上投行做IPO可以坐貨，等股價升嗰陣可再賺一筆。

關博士又話，大型IPO抽乾市場資金係好事，因為美股近期升得急，例如標指已升穿200天線好多，大型IPO陸續上市令美股有藉口回套，因為資金流晒去新股，所以投資者要小心美股回落時機。