【專家分析】投資貴金屬先篩走黃金

【Now財經台】美伊和談陷膠著狀態，開戰以來，除鋰業股外，其他礦業股未有跟隨相關商品價格向上，亦跑輸美股同業，其中1個原因可能係擔心中國需求喺戰亂下放緩，不過，近期中國公布嘅經濟數據，可唔可以釋除市場嘅疑慮？資源股有冇機會發力追落後？

天風國際李偉傑指，近期內地出爐嘅經濟數據，例如居民消費價格指數(CPI)及工業生產者出廠價格指數(PPI)都好理想，但背後其實所有價格都高咗，佢解釋，霍爾木茲海峽(Strait of Hormuz)被封鎖，其實會同時推高全球通脹。Jason坦言，通脹持續升溫喺消費層面其實係好事，但喺結構方面，因霍爾木茲海峽被封鎖而推高通脹，長遠未必係一個好方向。

Jason續稱，近期內地經濟數據喺戰火下仍偏向平穩，未有出現大問題，所以好多資源價格都會慢慢追上，所以投資勢頭好嘅貴金屬可能比較合適，雖然黃金有避險作用，但喺中東戰事下，金價走向其實同油價背馳，所以資金可能轉投其他貴金屬。