【名家給力場】「習特會」未必再引爆人仔大升浪(上)

【Now財經台】5月份市場焦點一定係快將舉行嘅「習特會」，有美國傳媒報道，華府計劃邀請英偉達(Nvidia)、蘋果公司(Apple Inc.)及埃克森美孚(ExxonMobil)等，多家美國巨企高層隨美國總統特朗普(Donald Trump)訪華，花旗等大行估計，地緣政治議題較經濟議題重要，去年10月喺南韓釜山舉行嘅亞太經濟合作會議(APEC)峰會，中美曾就減關稅、暫緩制裁及重啟大豆採購等達成協議，當時刺激人仔展開升浪，今次會唔會歷史重演？

勝利證券首席顧問陳建良坦言，對今次「習特會」可唔可以取得實質突破有保留，市場對中東局勢已出現消息疲勞，會面後雙方或發表不升級衝突等説辭，不過，中東局勢涉及伊朗、以色列等國，唔係中美可以完全掌控，預期金融市場對於緩解地緣壓力嘅反應，已經喺港美股市之前嘅反彈局部反映，所以對經濟嘅實質紓緩作用未必好明顯。

KL又話，去年達成嘅暫緩制裁，同埋稀土豁免協議仍有約5個月有效期，目前，中美雙方嘅討論已經唔似之前咁極限施壓，局勢相對平穩，估計今次未必會突然增加或放寬反制措施，人仔未必會因今次「習特會」展開新一輪大升浪。