【專家分析】記憶體股「大時代」有排玩

【Now財經台】美股近排強勢，記憶體3大龍頭之一美光科技(Micron)，股價更衝破600美元，連帶向企業提供SSD或HDD數據儲存嘅SanDisk、西部數據(Western Digital)都好強勢。早前，高盛指出，記憶體價格喺4月按年錄得倍數升幅，雖然部分投資者會Strong Hold，但股價升到冇頂咁，投資者好難揾到靚位買貨，呢個趨勢會持續幾耐？

泓瀚資本董事盧志威表示，如果睇返業績，好多科企巨無霸仍將資金投放喺新硬件或人工智能(AI)相關嘅伺服器、晶片等，擬發展AI相關應用產品，喺科企願意揼本下，投資者依家都估緊呢啲錢會使喺邊個範疇。

佢續指，科企嘅使錢速度冇慢落嚟，例如記憶體已供不應求，已經唔止掃GPU(圖形處理器)/CPU(中央處理器)，而係乜都買，喺呢個浪潮下，唔少企業都有巨大價值重估空間，佢估計，呢個周期最少去到明年或2028年。