【專家分析】中海外吼呢個位食糊唔賺遲

【Now財經台】內地近期又頻頻出招谷樓市，提高住房公積金貸款額度成主流政策，而市場一向關注貸款市場報價利率(LPR)，依家邊個數據最有參考價值？此外，摩根大通指，中國海外發展(00688)喺一線城市有好多項目，銷售增長穩健，係咪可以考慮部署？

高歌證券金融首席分析師聶振邦指，呢幾個月人民銀行都冇調整過LPR，所以參考性冇咁大，依家5年或以上公積金貸款利率2.6厘，屬偏低水平，加上環球通脹受美伊戰爭影響，因此，有內地消費者認為買樓可以保值，帶動近期房產業務向好。

聶Sir補充，對內房而言，若公司持有外債，人仔升值對還債有幫助，亦為人行提供更大減息空間，市場會憧憬按揭利率未來會進一步下調以刺激樓市。

佢又話，具備國企背景嘅中海外，對審慎嘅投資者有吸引力，股價2月初至今已經累積唔少升幅，估計短期會喺15元有阻力，有貨嘅投資者如果股價一星期內，收市都突破唔到15元，可以考慮止賺，未入場嘅可以考慮喺13元至13.2元水平買貨，息率高啲之餘，防守力亦更強。