【名家給力場】黃河實業收購只係短期催化劑？

【Now財經台】毫子股黃河實業(00318)今日(4日)復牌，股價一度飆逾1倍，高見1.35元，重返蚊股行列。消息面方面，公司披露一單收購及出售業務消息，集團向GoGoChart創辦人魯曉聚收購Slencor AI 40%股權，作價2400萬元，此外，黃河實業出售旗下消費金融業務(VCFC)60%股權予魯曉聚，以抵銷收購代價，今次交易對股東嚟講係咪好事？

《香港股票財技密碼》作者梁杰文指，黃河實業股價今日倍升，反映市場認為呢單Deal對公司有幫助，集團藉助大市對人工智能(AI)嘅熱度做收購，成功吸引眼球及游資炒作，但Mike認為，今次呢單Deal幾奇怪，因為公司將原有金融業務剥離，同賣家交換AI業務，喺市場上比較罕見。

Mike又話，雖然股價上股東有著數，但值得留意係，公司原有嘅金融業務佔60%控股權，但收購嘅AI公司僅佔40%，地位類似投資方，未來決策權及話事權未必咁大。此外，出售嘅金融業務按1倍市帳率(PB)賣出，但收購嘅公司除咗去年未有盈利，PB介乎5倍至6倍，屬於溢價收購，所以仍要睇呢間AI公司嘅技術，實際上幫唔幫到黃河實業，同埋可唔可以對公司現有商務客戶群產生交叉銷售，繼而帶動收入，否則，單睇現有數據，現階段對未來收入大爆發未有太大信心。