【FINTERVIEW】Fed新主席上場即打「考牌硬仗」？(上)

【Now財經台】5月全球其中1件「大事件」，就係鮑威爾(Jerome Powell)將於5月15日卸任聯儲局主席，若全球石油供應充足，令通脹壓力降溫，佢嘅繼任人會唔會有更大減息空間？美股4月表現搶眼，其中，標指愈升愈癲，踏入5月，環球市場係咪繼續由晶片及人工智能(AI)相關股主導？

富邦銀行(香港)投資策略及研究部主管潘國光指，美國第1季國內生產總值(GDP)表現唔錯，本土汽油、科企原材料及食品價格趨升，估計全球通脹壓力可能延續至第3季，不過，喺美國總統特朗普(Donald Trump)任命背景下，繼任人可能既唔敢加息亦唔會減息，認為聯儲局現時仍相對中立，美息今年或維持不變，但仍有機會因經濟受中東戰事影響而波動，導致局方要有行動，屆時就要喺救經濟與抗通脹之間作取捨。

Vicks又話，科技股及AI企業背後有基本因素支撐升勢，例如盈利增長及市場需求，加上企業間互相交叉投資，不過，現時美股估值已經好貴，相信企業股價已充分反映短期利好，若中東局勢惡化導致通脹壓力再升溫，兩者產生衝撞，一旦利好消息減弱，市場可能出現較大調整。