【專家分析】AI大時代「雲」係科企主戰場

【Now財經台】「科技7雄」(Magnificent 7)昨晚(29日)繼續派成績表，其中，亞馬遜(Amazon)上季多賺77%，營收按年增長17%，期內，雲計算業務AWS營收按年增長28%至近376億美元，係逾3年以來最勁，並高過市場預期，刺激股價喺昨日(29日)美股收市後延長交易時段大升，雖然集團上季資本開支(CapEx)高過預期，但未有上調全年預測。此外，微軟(Microsoft)上季純利亦超預期，但市場認為，集團雲業務表現唔及亞馬遜及Google。M7業績對人工智能(AI)行業前景有咩啟示？

艾德金融投資執行董事文錦輝指，雲業務係好關鍵，因為喺AI大時代下需求好大，如果雲業務做得好，市場就會有憧憬，即使往後資本開支再加大，都唔會有太大壓力。佢又指，睇返微軟過去幾年，由搞元宇宙到現在搞AI，不斷加大資本開支，但回報始終追唔上其他科企，所以資金就去咗其他有前景及憧憬嘅科企。

Felix又話，整體而言，近期出爐嘅美企業績好對辦，如果唔係因為美伊戰爭，相信包括道指在內嘅指數都有條件破頂，見到科企業績一出，納指又抽咗上去，不過，佢建議投資者等一等，依家納指上到24600點水平，其實已有啲高。