【名家給力場】戰亂下油服股ETF最穩定(上)

【Now財經台】雖然中東局勢近排冇進一步惡化，但依家嘅膠著狀態令霍爾木茲海峽(Strait of Hormuz)開通唔到，倫敦布蘭特期油已連升7個交易日，企喺每桶112美元樓上，布油及紐油今年已累積好大升幅，跑贏近期強勢嘅半導體股，呢個情況係咪會持續？

「股市漁夫」創辦人莊志雄指，布油及紐油年初至今做得最好，前者已累升近80%，依家喺高位整固，似乎跌返落90美元水平機會唔大，不過，仍預期遠期原油不久將來會回落。另一方面，市場一開始相信戰事會喺短期內解決，依家拖下拖下兩個月都未搞掂，要留意住市場會唔會突然price in咗呢樣野。

喺呢個情況下投資又好、做交易又好，佢訧話，油相關嘅就比較易trade，油服股交易所買賣基金(ETF)表現相對穩定，雖然1月、2月升得急，但3月細幅度調整後又再破頂，跑贏其他ETF，而半導體估值已經去到非常高水平，市盈率(PE)45倍。

佢續指，睇返石油煉油業裂解差價，依家56至57美元水平，而年初不足20美元，代表煉油商賺多過1倍利潤，所以20倍PE其實係好低水平，亦係有基本因素支持嘅表現，高價格差有高盈利亦反映油需求殷切、供應緊張嘅原因。