【期匯決算】Yen見160.5至162央行會出手

【Now財經台】下星期會進入環球央行議息周，喺日本央行議息前，日本今朝(24日)出咗3月通脹數據，上月核心消費物價指數(CPI)按年升幅擴大至1.8%，係5個月以來首度擴大，超預期，要受中東戰事推高油價影響，日圓就持續偏軟，但日本將會喺5月1日釋放第2輪石油儲備，對紓緩短期通脹壓力有冇幫助？

獨立外匯商品分析師盧楚仁表示，日本再釋放石油儲備，的確可以紓緩短期通脹壓力，但長遠仍解決唔到問題，因為石油儲備始終有限。

佢又話，日本政府會喺兩個情況下出手干預日圓匯價，首先係日圓突然暴跌，其次係日圓觸及央行入市干預水平，現時日圓迫近160水平，當局已開始暗示將會有行動，估計出手干預區間喺160.5至162，投資者要小心留意。