【全民打新】天星醫療冇Hit爆AI概念都難抽？

【Now財經台】內地運動醫學醫療器械供應商天星醫療(01609)今日(24日)開始招股，招股價98.5元，入場費約4974元，下星期三(29日)截飛，股份計劃5月5日首日掛牌買賣。集團專注於運動醫學，產品針對肩部、膝部、足部，同市場上已有嘅醫療器械股有少少唔同，呢個係咪賣點之一？

《香港股票財技密碼》作者梁杰文指，天星嘅醫學賽道有一定獨特性，雖然冇科技咁熱炒，但醫療行業勝在穩定，無論外圍經濟幾動盪都唔會太受影響，所以即使冇人工智能(AI)元素，但見到公司過去幾年業績仍穩定增長。

此外，新股喺新機制下，基於供求問題，中籤率都偏低，大部分都唔係咁易抽中，天星係咪都一樣？

Mike就話，貨源的確會較緊張，天星今次集資額唔夠10億元，大部分股分都有基石投資者認頭，由於同期冇其他新股撞期招股，估計招股反應理想，有機會超額認購逾千倍。